జోరుగా 'ఇంటింటికీ తెలుగుదేశం'.. 13 రోజుల్లో 37 లక్షల ఇళ్లకు!

తెలుగుదేశం పార్టీ ప్రతిష్ఠాత్మకంగా చేపట్టిన 'ఇంటింటికీ తెలుగుదేశం – 2 ఏళ్ల నమ్మకం – అభివృద్ధి, సంక్షేమం' కార్యక్రమం ప్రజాదరణతో విజయవంతంగా ముందుకు సాగుతోంది. శనివారంతో ఈ కార్యక్రమం 13వ రోజుకు చేరుకుంది. కూటమి ప్రభుత్వం అధికారంలోకి వచ్చి రెండేళ్లు పూర్తయిన సందర్భంగా, ఈ రెండేళ్లలో సాధించిన అభివృద్ధి, అమలు చేస్తున్న సంక్షేమ పథకాలను ప్రజల్లోకి తీసుకెళ్లేందుకు టీడీపీ ఈ కార్యక్రమాన్ని నిర్వహిస్తోంది.

రాష్ట్రవ్యాప్తంగా పార్టీ శ్రేణులు ఈ కార్యక్రమంలో ఉత్సాహంగా పాల్గొంటున్నాయి. కార్యక్రమం ప్రారంభమైన నాటి నుంచి ప్రజల నుంచి విశేష స్పందన లభిస్తోందని పార్టీ వర్గాలు తెలిపాయి. 13వ రోజు ఒక్కరోజే రాష్ట్రవ్యాప్తంగా 3.56 లక్షల ఇళ్లను టీడీపీ నాయకులు, కార్యకర్తలు సందర్శించారు. దీంతో గత 13 రోజుల్లో కలిపి మొత్తం 37.21 లక్షల కుటుంబాలను నేరుగా కలిసినట్లు అయింది.

ఈ పర్యటనలలో భాగంగా, ఎన్నికల సమయంలో ఇచ్చిన 'సూపర్ సిక్స్' హామీల అమలు తీరును, ప్రభుత్వం చేపట్టిన ఇతర సంక్షేమ, అభివృద్ధి కార్యక్రమాల ఫలాలను ప్రతి కుటుంబానికి వివరిస్తున్నారు. ప్రభుత్వ పనితీరుపై ప్రజలకు అవగాహన కల్పించడమే లక్ష్యంగా ఈ కార్యక్రమం సాగుతోంది. రాష్ట్ర మంత్రులు, ఎమ్మెల్యేలు, ఎమ్మెల్సీలతో పాటు నియోజకవర్గ, మండల, గ్రామ స్థాయి నాయకులు, కార్యకర్తలు పెద్ద ఎత్తున పాల్గొంటూ పండుగ వాతావరణంలో ఈ కార్యక్రమాన్ని కొనసాగిస్తున్నారు.